இலங்கைக்கான கனடிய உயர்ஸ்தானிகர் திருமதி இசபெல் மார்ட்டின் மற்றும் அவரது தூதுக்குழுவினர், நாடாளுமன்றத்தில் பிரதமர் கலாநிதி ஹரிணி அமரசூரியவைச் சந்தித்தனர்.
உயர்ஸ்தானிகரையும் அவரது தூதுக்குழுவினரையும் வரவேற்ற பிரதமர், இலங்கைக்கும் கனடாவுக்கும் இடையிலான நீண்டகால இருதரப்பு உறவுகளை மேலும் வலுப்படுத்துவதன் முக்கியத்துவத்தை வலியுறுத்தினார்.
இரு நாடுகளுக்கும் இடையிலான உறவை மேலும் மேம்படுத்துவதற்கு, இரு நாட்டு மக்களுக்கிடையிலான பிணைப்பை வலுப்படுத்துவது மிக முக்கியமானது என்று உயர்ஸ்தானிகர் சுட்டிக்காட்டினார்.
இலங்கை மற்றும் கனடாவில் உள்ள பல்கலைக்கழகங்களுக்கு இடையிலான கூட்டாண்மைகளை ஊக்குவிப்பதன் மூலம், கல்வித்துறையில் ஒத்துழைப்பை மேம்படுத்துவதற்கான வாய்ப்புகள் குறித்தும் இரு தரப்பினரும் கலந்துரையாடினர்.
மேலும், தொழிற்கல்வி மற்றும் தொழில்நுட்பக் கல்வித் துறையில்—திறன் மேம்பாடு மற்றும் அறிவுப் பரிமாற்றம் உள்ளிட்ட அம்சங்களில்—ஒத்துழைப்பை விரிவுபடுத்த வேண்டியதன் அவசியம் குறித்து இச்சந்திப்பில் வலியுறுத்தப்பட்டது. கல்வி வாய்ப்புகளை ஊக்குவித்தல் மற்றும் நிறுவனங்களுக்கு இடையிலான கூட்டாண்மைகளை ஏற்படுத்துதல் ஆகியவற்றின் ஊடாக, அறிவியல் கல்வித் துறையில் ஒத்துழைப்பை மேலும் மேம்படுத்துவதற்கான சாத்தியக்கூறுகள் குறித்தும் கலந்துரையாடப்பட்டது.

























































