வழுக்கை மற்றும் முடி உதிர்வுப் பிரச்சினைக்குத் தீர்வாக, முடி மீண்டும் வளர்ச்சியடைவதைத் தூண்டும் புதிய மின்னணுச் சீப்பை சீன விஞ்ஞானிகள் உருவாக்கியுள்ளனர்.
இந்தச் சீப்பைப் பயன்படுத்தி மேற்கொள்ளப்பட்ட ஆய்வில், வெறும் 28 நாட்களில் ஆய்வக எலிகளின் வழுக்கையான பகுதிகளில் சுமார் 98 சதவீதம் முடி வளர்ச்சியை ஏற்படுத்தியுள்ளதாகத் தெரிவிக்கப்பட்டுள்ளது.
பெய்ஜிங்கில் உள்ள பெய்ஹாங் பல்கலைக்கழகம் மற்றும் ஹொங்கொங் நகரப் பல்கலைக்கழக விஞ்ஞானிகள் இணைந்து இந்தச் சாதனத்தை உருவாக்கியுள்ளனர். இதற்கு ‘Detangle’ எனப் பெயரிடப்பட்டுள்ளது.
கடந்த நவம்பர் 3ஆம் திகதி ‘Nature Communications’ என்ற அறிவியல் ஆய்விதழில் வெளியிடப்பட்ட ஆய்வின்படி, இந்தச் சாதனம் மிதமான மின்தூண்டல் மற்றும் முடி வேர்களுக்கு நேரடியாகச் சிகிச்சை மூலக்கூறுகளைச் செலுத்தும் தொழில்நுட்பம் ஆகியவற்றை ஒருங்கிணைக்கிறது.
சாதாரண முடி உதிர்வு சிகிச்சைகளில் வெளிப்புறமாக மருந்துகள் பயன்படுத்தப்படும் நிலையில், இந்த மின்னணுச் சீப்பின் பற்களில் பொருத்தப்பட்டுள்ள நுண்ணிய மின்முனைகள் ஊடாக மின்துடிப்புகள் உருவாக்கப்படுகின்றன.
இதன் மூலம் சிகிச்சைக்கான மூலக்கூறுகள் தோலின் ஆழமான பகுதிகளுக்குச் சென்று முடி வேர்களைச் சென்றடைவதற்கு உதவுவதாக ஆய்வாளர்கள் தெரிவிக்கின்றனர்.
மரபணு மற்றும் ஹோர்மோன் சார்ந்த வழுக்கை பாதிப்பு செயற்கையாக ஏற்படுத்தப்பட்ட எலிகளில் இந்தச் சாதனம் பரிசோதிக்கப்பட்டுள்ளது.
இதன்போது, மின்தூண்டல் மற்றும் சிகிச்சை மூலக்கூறுகள் இணைந்து பயன்படுத்தப்பட்ட எலிகளில் 28 நாட்களுக்குப் பின்னர் சுமார் 97.85 சதவீத முடி வளர்ச்சி பதிவாகியுள்ளது.
அதேவேளை, முடி உதிர்வுக்குப் பொதுவாகப் பயன்படுத்தப்படும் மினொக்சிடில் (Minoxidil) மருந்து பயன்படுத்தப்பட்ட எலிகளில் சுமார் 70 சதவீத முடி வளர்ச்சியே பதிவாகியுள்ளதாக ஆய்வில் குறிப்பிடப்பட்டுள்ளது.
அன்றாடம் பயன்படுத்தும் சீப்பு போன்ற வடிவத்தில் இந்தச் சாதனம் வடிவமைக்கப்பட்டுள்ளதால், முடி உதிர்வுக்கான சிகிச்சையை இலகுவாக்க முடியும் என ஆய்வாளர்கள் நம்பிக்கை வெளியிட்டுள்ளனர்.
எனினும், இந்த ஆய்வு இதுவரை விலங்குகளில் மாத்திரமே வெற்றிகரமாகப் பரிசோதிக்கப்பட்டுள்ளது. மனிதர்களில் முடி மீண்டும் வளர்வதை உறுதிப்படுத்தும் மருத்துவப் பரிசோதனைகள் இதுவரை மேற்கொள்ளப்படவில்லை.
எனவே, மனிதர்களின் பயன்பாட்டுக்கு அறிமுகப்படுத்துவதற்கு முன்னர் இதன் பாதுகாப்பு, செயல்திறன் மற்றும் நீண்டகாலப் பக்கவிளைவுகள் குறித்து மேலதிக ஆய்வுகளும் மருத்துவப் பரிசோதனைகளும் அவசியம் என விஞ்ஞானிகள் வலியுறுத்தியுள்ளனர்.
உலகளவில் மில்லியன் கணக்கான மக்களைப் பாதிக்கும் வழுக்கைப் பிரச்சினைக்கான புதிய சிகிச்சை முறைகளை உருவாக்கும் ஆய்வில் இந்தக் கண்டுபிடிப்பு முக்கிய முன்னேற்றமாகக் கருதப்படுகிறது.

















































