மலையக மக்களின் அரசியல், தொழிற்சங்க மற்றும் இலக்கிய வரலாற்றில் குறிப்பிடத்தக்க பங்களிப்பைச் செய்த அமரர் சி.வி. வேலுப்பிள்ளையின் 42ஆவது நினைவு தினம் அனுஷ்டிக்கப்பட்டுள்ளது.
இதனை முன்னிட்டு, 2026.11.19ஆம் திகதி வியாழக்கிழமை முற்பகல் 11 மணிக்கு மடக்கும்புர தோட்டத்தில் நினைவஞ்சலி நிகழ்வு சிறப்பாக ஏற்பாடு செய்யப்பட்டிருந்தது.
தொழிலாளர் தேசிய சங்கம் மற்றும் தொழிலாளர் தேசிய முன்னணியின் தலைவர் பழனி திகாம்பரத்தின் பணிப்புரைக்கமைய நடைபெற்ற இந்நிகழ்வில், மடக்கும்புர தோட்ட ஸ்ரீ முத்துமாரியம்மன் ஆலயத்தில் விசேட பூஜை வழிபாடுகள் இடம்பெற்றன.
இதனைத் தொடர்ந்து, அமரர் சி.வி. வேலுப்பிள்ளையின் நினைவுத் தூபியில் மலரஞ்சலி செலுத்தி அஞ்சலி நிகழ்வு முன்னெடுக்கப்பட்டது.
இந்நிகழ்வில் தொழிலாளர் தேசிய சங்கத்தின் செயலாளர், தொழிலாளர் தேசிய முன்னணியின் செயலாளர், நிர்வாகச் செயலாளர், உப தலைவர்கள், உயர்பீட உறுப்பினர்கள், பிரதேச சபை உறுப்பினர்கள், அமைப்பாளர்கள், தோட்டக் கமிட்டித் தலைவர்கள் மற்றும் தலைவிகள், அலுவலக உத்தியோகத்தர்கள் உள்ளிட்ட பலரும் பொதுமக்களும் கலந்துகொண்டனர்.
1914ஆம் ஆண்டு செப்டெம்பர் 14ஆம் திகதி மடக்கும்புர தோட்டத்தில் பிறந்த சி.வி. வேலுப்பிள்ளை, ஆசிரியர், கவிஞர், நாவலாசிரியர், இதழாளர், தொழிற்சங்கவாதி மற்றும் நாடாளுமன்ற உறுப்பினர் எனப் பல்வேறு துறைகளில் பணியாற்றியவர்.
தோட்டத் தொழிலாளர்களின் வாழ்க்கை அனுபவங்களைத் தனது எழுத்துக்களிலும் பொதுப்பணிகளிலும் வெளிப்படுத்திய அவர், மலையக இலக்கியத்தின் முன்னோடிகளில் ஒருவராகக் கருதப்படுகின்றார்.
1947ஆம் ஆண்டு நடைபெற்ற முதலாவது நாடாளுமன்றத் தேர்தலில் தலவாக்கலைத் தொகுதியிலிருந்து தெரிவு செய்யப்பட்ட அவர், மலையக மக்களின் பிரதிநிதியாக நாடாளுமன்றத்தில் பணியாற்றினார். தொழிலாளர்களின் சம்பளம், தொழில் பாதுகாப்பு மற்றும் தொழிற்சங்க உரிமைகளுக்காகவும் தொடர்ந்து குரல் கொடுத்தார்.
தொழிலாளர் தேசிய சங்கத்தின் உருவாக்கத்தில் வி.கே. வெள்ளையனுடன் இணைந்து பங்காற்றிய சி.வி. வேலுப்பிள்ளை, அச்சங்கத்தின் செயலாளராகவும் பணியாற்றினார். தொழிலாளர்களை ஒன்றிணைப்பதிலும் அவர்களின் உரிமைக் கோரிக்கைகளை முன்னெடுப்பதிலும் அவரது பங்களிப்பு முக்கியத்துவம் பெற்றது.
அவரது இலக்கியப் படைப்புகள் மலையக மக்களின் உழைப்பு, வறுமை, வாழ்விடப் பாதுகாப்பின்மை மற்றும் சமூக அனுபவங்களைப் பதிவு செய்தன. In Ceylon’s Tea Garden, Born to Labour, வீடற்றவன் ஆகிய படைப்புகள் அவரது எழுத்துப் பணியின் குறிப்பிடத்தக்க வெளிப்பாடுகளாகும்.
தமிழ் மற்றும் ஆங்கில மொழிகளில் எழுதிய அவர், மலையக மக்களின் வாழ்க்கையைப் பரந்த வாசகர் வட்டத்திற்குக் கொண்டு சென்றார்.
மேலும், மலையக மக்களின் வாய்மொழி மரபுகளையும் நாட்டுப்புறப் பாடல்களையும் தொகுத்துப் பாதுகாத்த அவர், மலைநாட்டு மக்கள் பாடல்கள் என்ற நூலையும் வெளியிட்டார். கதை, மாவலி ஆகிய இதழ்களின் ஆசிரியராகவும் செயற்பட்டு இலக்கியத்திற்கும் சமூக விழிப்புணர்வுக்கும் பங்களித்தார்.
1984ஆம் ஆண்டு நவம்பர் 19ஆம் திகதி தனது 70ஆவது வயதில் சி.வி. வேலுப்பிள்ளை காலமானார்.
அவரது மறைவின் 42 ஆண்டுகள் நிறைவடைந்துள்ள நிலையில், மலையக மக்களின் உரிமைகளுக்காகவும் அவர்களின் வாழ்க்கையை இலக்கியத்தில் பதிவு செய்வதற்காகவும் அவர் ஆற்றிய பணிகள் நினைவுகூரப்படுகின்றன.






















































