2026ஆம் ஆண்டுக்கான கல்விப் பொதுத் தராதர சாதாரண தரப் பரீட்சைக்குரிய அனுமதிப்பத்திரங்களில் காணப்படும் தவறுகளைத் திருத்துவதற்கான சந்தர்ப்பம் வழங்கப்பட்டுள்ளதாக இலங்கை பரீட்சைகள் திணைக்களம் அறிவித்துள்ளது.
இதன்படி, நவம்பர் 19ஆம் திகதி முதல் எதிர்வரும் நவம்பர் 30ஆம் திகதி நள்ளிரவு 12 மணி வரை இணையவழியாகத் திருத்தங்களை மேற்கொள்ள முடியும் எனத் தெரிவிக்கப்பட்டுள்ளது.
பரீட்சைக்குத் தோற்றவுள்ள மாணவர்களின் அனுமதிப்பத்திரங்களில் தவறான தகவல்கள் காணப்படுமாயின், அவற்றை உரிய காலப்பகுதிக்குள் திருத்திக்கொள்ள வேண்டியது அவசியமாகும்.
பாடசாலை பரீட்சார்த்திகளின் அனுமதிப்பத்திரங்கள் சம்பந்தப்பட்ட வலயக் கல்வி அலுவலகங்களுக்கு அனுப்பி வைக்கப்பட்டுள்ளன. தனிப்பட்ட பரீட்சார்த்திகளின் அனுமதிப்பத்திரங்கள் அவர்களது தனிப்பட்ட முகவரிகளுக்கு அஞ்சல் மூலம் அனுப்பப்பட்டுள்ளன.
பாடசாலை பரீட்சார்த்திகளின் அனுமதிப்பத்திரங்களில் திருத்தங்கள் தேவைப்பட்டால், சம்பந்தப்பட்ட பாடசாலை அதிபர்கள் பரீட்சைகள் திணைக்களத்தின் உத்தியோகபூர்வ இணையத்தளத்திற்குச் சென்று, தங்களுக்கு வழங்கப்பட்ட பயனர் பெயர் மற்றும் கடவுச்சொல்லைப் பயன்படுத்தி அவற்றை மேற்கொள்ள வேண்டும்.
முதலாம், இரண்டாம் மற்றும் மூன்றாம் தடவையாகப் பரீட்சைக்குத் தோற்றும் பாடசாலை விண்ணப்பதாரர்களுக்கும் இந்த நடைமுறை பொருந்தும்.
இதேவேளை, தனிப்பட்ட பரீட்சார்த்திகள் தமது தேசிய அடையாள அட்டை இலக்கத்தைப் பயன்படுத்தி இணையத்தளத்திற்குள் நுழைந்து, பெயர், முகவரி, பரீட்சைக்குத் தோற்றும் பாடங்கள், பரீட்சை மொழிமூலம் மற்றும் பால்நிலை உள்ளிட்ட தகவல்களில் காணப்படும் தவறுகளைத் திருத்திக்கொள்ள முடியும்.
குறிப்பாக, பரீட்சார்த்திகளின் பெயர்களில் திருத்தங்கள் தேவைப்பட்டால், அவற்றை வழங்கப்பட்ட கால அவகாசத்திற்குள் கட்டாயமாக மேற்கொள்ள வேண்டும் எனப் பரீட்சைகள் திணைக்களம் வலியுறுத்தியுள்ளது.
பரீட்சை நிறைவடைந்த பின்னர் பெயர்களில் திருத்தங்களை மேற்கொள்வதற்கு எக்காரணம் கொண்டும் அனுமதி வழங்கப்படமாட்டாது எனவும் அறிவிக்கப்பட்டுள்ளது.
அத்துடன், பரீட்சார்த்திகள் தமது முழுப் பெயர் ஆங்கிலத்தில் சரியாகப் பதிவுசெய்யப்பட்டுள்ளதா என்பதை உறுதிப்படுத்திக்கொள்ளுமாறும் அறிவுறுத்தப்பட்டுள்ளனர்.
திருத்தங்களை மேற்கொள்வதற்காக வழங்கப்பட்டுள்ள நவம்பர் 30ஆம் திகதி வரையிலான கால அவகாசம் எக்காரணம் கொண்டும் நீடிக்கப்படமாட்டாது எனத் தெரிவிக்கப்பட்டுள்ளது.
2026ஆம் ஆண்டுக்கான க.பொ.த சாதாரண தரப் பரீட்சை எதிர்வரும் டிசம்பர் 8ஆம் திகதி முதல் 17ஆம் திகதி வரை நாடளாவிய ரீதியில் 3,519 பரீட்சை நிலையங்களில் நடைபெறவுள்ளது.
மேலதிக தகவல்களைப் பெற்றுக்கொள்ள விரும்பும் பரீட்சார்த்திகள் பரீட்சைகள் திணைக்களத்தின் 1911 என்ற அவசர தொலைபேசி இலக்கத்தையோ, 011 2784208 மற்றும் 011 2784537 ஆகிய தொலைபேசி இலக்கங்களையோ தொடர்புகொள்ள முடியும்.
மேலும், பரீட்சைகள் திணைக்களத்தின் உத்தியோகபூர்வ இணையத்தளம் ஊடாகவும் தகவல்களைப் பெற்றுக்கொள்ளலாம்.
இந்த அறிவிப்பை பரீட்சைகள் ஆணையாளர் நாயகம் ஏ.கே.எஸ். இந்திகா குமாரி லியனகே வெளியிட்டுள்ளார்.





















































