தேசிய மக்கள் சக்தி அரசாங்கத்தின் வரவு – செலவுத் திட்டம் நாடாளுமன்றத்தில் நிறைவேற்றப்பட்டாலும், மக்கள் அதனை ஏற்கனவே நிராகரித்துவிட்டனர்” என்று சிறிலங்கா பொதுஜன பெரமுன கட்சி தெரிவித்துள்ளது.
மாகாண சபைத் தேர்தல் நடத்தப்பட்டால் இதன் பிரதிபலிப்பைக் காண முடியும் எனவும், தேர்தலை நடத்துமாறு அரசாங்கத்துக்குச் சவால் விடுப்பதாகவும் மொட்டுக் கட்சியின் முக்கியஸ்தரும் முன்னாள் இராஜாங்க அமைச்சருமான ஜனக வக்கும்புர தெரிவித்தார்.
இது தொடர்பில் அவர் மேலும் தெரிவிக்கையில்,
“தேசிய மக்கள் சக்திக்கு நாடாளுமன்றத்தில் பெரும்பான்மைப் பலம் உள்ளது. எனவே, வரவு – செலவுத் திட்டம் தடையின்றி நிறைவேறும். ஆளுங்கட்சி கூறுவதைப் போன்று இது சிறந்த வரவு – செலவுத் திட்டமாக இருந்தால், மாகாண சபைத் தேர்தலை நடத்துமாறு சவால் விடுக்கின்றோம். அவ்வாறு தேர்தல் நடத்தப்பட்டால் மக்கள் உரிய பதிலடியைக் கொடுப்பார்கள்.
மக்கள் வரவு – செலவுத் திட்டத்தை ஏற்கனவே நிராகரித்துவிட்டனர். எனவே, முடிந்தால் தேர்தலை நடத்திக் காட்டுமாறு மீண்டும் சவால் விடுக்கின்றோம்” என்றார்.
















































